【疫情下的鐵人魂(二):Toby】

更新日期:2020年10月16日

三項鐵人運動,兼顧游踩跑嘅訓練投放時間唔少,亦需要到不同場地進行訓練,面對疫情,各種限制的確令好多鐵人運動員頭痕。

【疫情下的鐵人魂】第二篇主角Toby To,同第一篇嘅主角Ball Wing可以稱得上出身入死嘅好兄弟,佢哋係毅行者嘅隊友、同樣對運動嘅熱愛達到瘋狂級,同樣不斷挑戰自己極限、佢哋亦係練習中互相鼓勵、互相配速(互相傷害)嘅老友。

鐵人的執著 - 杜銘城(Toby To)

參與三項鐵人年資:約10年


最佳完成時間:

Half-Ironman 4小時43分

Ironamn 10小時33分


小編眼中嘅Toby,係一位對整項運動都有一份執著嘅運動員,由著上身嘅Trisuit、戰車嘅設定、訓練課表至飲食,每一步都十分重視。 (小編嘅其中一個例子就係TT車armpad position,Toby都會經常用時間去慢慢調較,再踩一段時間做檢討)


入番正題,一個咁有執著咁有堅持嘅運動員,係疫情之下,到底會有咩應對?點樣keep住團火?

疫情前訓練:

每星期訓練約13-15小時,

游泳/游海訓練:3-4次,約12公里
單車訓練:室外練習2-3次,約200公里,再加1-2次單車機強度訓練約4-5小時
跑步總里數約50公里,包括耐力跑及速度訓練,亦會用到跑步機協助速度練習
每星期2次體能訓練,因為長距離運動容易造成勞損,所以會配合針對性嘅體能訓練,減低受傷機會。

疫情下訓練安排:

疫情下每星期訓練大約8-10小時,當中7-8成時間係單車機上,透過ZWIFT去做單車訓練,每次大約2-2.5小時,最長一課係4.5小時,因為未有比賽時間表,暫時訓練集中耐力為主,強度並唔會定得太高;
因為泳池同沙灘封閉,所以游水訓練只能夠用體能訓練代替;
跑步訓練由原來每星期50公里大減至約20公里,特別係確診宗數過百單嘅時候,為左減少外出,會留係屋企跳繩代替跑步;
同時戴口罩跑亦增加訓練難度,距離同速度都要從新編排,疫情之下,最長一課20公里跑,用平均5:30 pace完成,比較疫情前跑4:30 pace大幅度調低。

訓練以外 • 飲食協調

近年運動界別興起透過素食提升運動表現,所以都有了解相關資料,並且係2019年尾開始減少吃肉,現時日常飲食以「海鮮素」為主,即只吃蔬菜及海鮮。
改變飲食習慣碰上疫情高峰期,起初轉「海鮮素」感到運動時能量有不足,但正正碰上疫情高峰,訓練量減少嘅情況下,可以更容易控制體重,唔會一下子增磅。
「海鮮素」飲食對運動表現仍然觀察中,因為未完全回復訓練,亦未有賽事反映岀對成績影響。

疫情放緩後訓練安排:

疫情下每個運動員受到嘅影響都唔同,re-start時要留意身體狀況,課表安排最好先以中低強度為主,切忌過分進取及追求盡快回復舊有訓練課表,避免受傷。
現時Toby開始回復長跑訓練,因疫情里數同強度大減,暫時2-3星期每課都會大約10公里為主,以一個較輕鬆均速5:00-5:30完成,俾身體適應訓練感覺;亦會到泳池、田徑場同Gym Room進行訓練,預計一個月後可重回舊有訓練計劃。

訓練re-start小貼示:

切忌心急追進度 • 免受傷長玩長有

#疫情下的鐵人魂 #TobyTo #三項鐵人 #耐力運動員 #執著 #海鮮素 #長玩長有



441 次瀏覽0 則留言