嚟到比賽規例4.0，Leo講解嘅主題除左運動員要留意，作為觀眾或家長嘅你都要留意，以免大意而令到運動員被取消資格。
World Triathlon二級裁判 - 巫思遠(Leo)
-前香港三項鐵人代表
-World Triathlon二級教練
-香港三項鐵人總會二級教練及裁判
-2004年到今為香港賽事擔任大會裁判
『旁人協助作賽』
呢一樣係好多本地賽期間經常被觀眾同家長忽略嘅一環，協助作賽係指以任何形式的物質支援或個人協助幫助正在進行賽事的運動員。舉例，教練或家長在轉項區外面企喺小朋友嘅單車附近用聲線提點，本質上無問題亦無犯規。但如果教練家長接過小朋友遞俾佢哋嘅泳帽泳鏡或者用可以加壓嘅水壺幫小朋友沖洗雙腳之類，咁就已經算係一種實質嘅協助。(以下片段由Go Goal Kids學員示範其中4個係比賽常見事例)
除左本地賽事，國際賽事亦會發生同樣情況
最近嘅國際賽事有一個案例，挪威運動員Casper Stornes因為防寒衣（Wetsuit）嘅拉鏈卡死咗而走去搵轉項區後面嘅領隊幫手解開，事後Casper被直接取消資格，呢件事大家可能覺得卡住確係不幸，但運動員亦都應該要事前檢查清楚自己所有嘅比賽用品，先至能夠暢順做好每一個環節。
另外「旁人協助作賽」規則仲有一個本質，就係唔可以喺物理學上協助運動員有前進的行為。其中一個事例要回顧2016年墨西哥科蘇梅爾島（Cozumel）嘅WTS Grand Final賽事，當時未有不准協助他人前進嘅規例。當時去到跑步賽段嘅最後階段，英國選手Jonathan Brownlee懷疑因天氣炎熱體力不繼有暈倒徵兆，從後趕上嘅Alistair Brownlee(Jonathan的哥哥)就扶起Jonathan一齊完成剩低嘅賽段並先推Jonathan衝線以保住成績，當刻大家(包括大量媒體報導兩位兄弟之情)見到嘅畫面係體育精神嘅體現，但背後其實仲有一件事改變咗全世界，就係同當年年終世界排名有關，如果當日Jonathan無能力衝過終點，最終嘅排名將會有所改變，對其他參賽運動員有絕對性嘅影響。西班牙三項鐵人總會作出上訴，提出對Jonathan接受協助應判取消資格，但當年規則並沒加入前進呢一項所以上訴不成立，翌年國際總會ITU（現稱World Triathlon）就正式修改比賽規則。兩位運動員互相幫助有另一種嘅情況同前進無關，就係賽事期間兩位交換整架單車，單車架，單車轆，頭盔或者任何比賽用品，令其中一位得益，另一位無完成賽事的話，最終兩位都會被取消資格。
仲有一種比較少見，係透過交通工具而得益，眾所周知輪車／勾車（Drafting） 能夠令跟喺後面嘅運動員大大減少體力嘅消耗，無論比賽係咩距離都好，記得絕對唔可以跟喺任何非單車嘅後面，因為係可以直接判為取消資格。
參考：World Triathlon Competition Rules Sec. 2 Conduct of athletes - 2.2 Sec. 33 Appendix K - 30, 31, 39, 87, 90 Youtube - 2016 Cozumel Brownlee Brothers Finish The Guardian - Alistair Brownlee gives up chance to win triathlon and helps brother over line
相片來源：網上圖片